كلمات سعيد الغزالي- القدس المحتلة
سلام تعظيم
نشيد تكريم لصاحب المقام العالي
لرئيس الحراس
احترامات لرئيس السلك الدبلوماسي
تبجيلات للمفاوضين المستيقظين
تكريمات للنائمين المفاوضين
رقصات فرفشة وضحك على اللحى والذقون
لرجال السلك السياسي
موسيقى فرح للشعب المغبون
سجادة حمرا نفردها لرئيس دولتنا
مرحى مرحى
دولتنا قامت
والفرحة طلت من كل العيون
ورئيسنا عيّناه المسؤول الأول في دولة فضلة اسرائيل
وشعار دولة فضلة إسرائيل حافر وشوال برسيم وحزمة سنابل قمح معدول
تأكل مش مهم شو تاكل
تشرب مية عكرة ومش مهم تعطش
مش مهم الشعب يكون ملطشة إسرائيل
أنا مش عارف ليش لازم نبقى مذلولين
ليش ما نشرب مية نظيفة من ينابيع بلادنا
وليش ما ناكل من زرع بلادنا
والرئيس ياكل وياكلوا معه الحراس
سيافو عندو جاهز لقطع الراس
يا ناس المال للحكم أساس
ومخبرين يكتبون التقارير
وعندو زعران وشلة جواسيس
زقطوط زغير, عمال محرومين
وشوية فلاحين اراضهم صادرها الناطور
دولة مخاتير وطراطير
دولة مجاذيب
دولة قادة ونواطير
من الشمال بيسان المحتلة
ومن الجنوب صحراء النقب محتلة
ومن الشرق الغور المحتل
ومن الغرب أرض فلسطين المحتله
نسينا نذكر غزة المعزولة المفصولة المحصورة بالبحر والصحرا
دولة ما إلها بحر ولا نهر ولا سما ولا ارض ولا حدود
دولة في بطن الحوت ساكنة
والحوت اسمه إسرائيل
يا خيي شو نسمي ها الدولة
يا خيي شو نسمي ها الدولة
0 comments:
Post a Comment