الزحف المليوني

حكايات حنكشتيكا الساخرة

حلقة رقم 31

سعيد الغزالي- القدس المحتلة

يبدو أن الكلام عن الزحف المليوني إلى فلسطين يوم الخامس عشر من أيار لتحريرها لم يتم تأكيده بعد، وقد أعرب العديد من أهل العلم والموقف في مصر عن عدم تأييدهم له باعتبار أن ذلك من شأنه أن يهدد الأمن القومي المصري، رغم أنهم من أنصار القضية الفلسطينية الذين يعدون لنصرة غزة وإرسال المساعدات لها. من جهة أخرى، لم تتبنى أي جهة معلومة هذا النشاط الذي نشر عنه على صفحات الفيسبوك والتوتر. وقيل أن شرارة الانتفاضة الفلسطينية ستبدأ بهذا الزحف المليوني. من الجدير ملاحظته، أن الانتفاضة الفلسطينية الأولى والثانية تفجرتا بعد احتقان شعبي وقهر بأشكاله وانسداد الأفق السياسي.

يدور حوار هنا بين حنكشتيكا وصديقه أبي معروف، ويبدو أن أبو معروف يعارض الزحف المليوني، ويؤيده حنكشتيكا.  

حنكشتيكا: شو حضرت حالك. جهزت الشباب.

أبو معروف: على شو أجهز الشباب.

حنكشتيكا: مالك بتتهبل، مش عارف، موعدنا في الخامس عشر من شهر أيار، موعد انطلاقة الانتفاضة الثالثة.

 أبو معروف: هاي السنة؟

حنكشتيكا: طبعا هاي السنة. مش عارف. شو عامل حالك بابا غايب. (أي تتجاهل الأمر، كأنك غائب عنه)

أبو معروف: على إيش بتتكلم؟

حنكشتيكا: أتكلم عن الزحف المليوني.

أبو معروف: يا جماعة لسة بدري. خلينا ناخد الأمور بتروي. يكفي أخطاء الماضي. خلينا نشوف مستقبلنا. بلاش ناخد قرار، وبعدين نندم عليه.

حنكشتيكا: بدري على إيش؟ وقرار إيش ونندم ليش؟ ما احنا اخدنا القرار. والشباب صاروا جاهزين. في الاردن، ومصر وسوريا ولبنان وكل دول العالم. ألم تقرأ البيان في الفيسبوك؟

أبو معروف: قرأته، بس أنا شايف أنه نأجلها شوية، سنة ولا سنتين. ناخد نفس. ما احنا تعبنا انتفاضتين ومفاوضات اندورنا.

حنكشتيكا: بدك إيانا نقعد ساكتين بدون انتفاضة سنة وسنتين

ابومعروف: لماذا ترى الأمور أسود أو أبيض، يعني إما أن تنتفض او تقعد لا تعمل شيئا. إبدأ ببناء البلد وصلح الخراب اللي فيها. اعمل انتفاضة بناء، انتفاضة تعليم، انتفاضة تكنولوجيا، انتفاضة انتاج.  

حنكشتيكا: ما ينفعش. احنا بدنا نعمل انتفاضة زي بقية العرب. العرب كلهم انتفضوا، ومش عيب علينا نضل ساكتين. بدنا العرب يزحفوا لفلسطين.

أبو معروف: معلش اعمل انتفاضة ولكن عليك أن تحسب الربح والخسارة، شوف شو اللي صار فينا خلال الانتفاضتين. نعمل حساب شو ربحنا وشو خسرنا. ونشوف شو ممكن نربح وشو ممكن نخسر، اذا عملنا الانتفاضة الثالثة. 

حنكشتيكا: بس صرنا حاكيين والعرب صاروا جاهزين، بدهم يزحفوا بالملايين.

أبو معروف: انت بتحلم. العرب مش جاهزين. في سوريا، الناس منتفضين ضد النظام وفي مصر الناس عندهم مليون مشكلة، يعني بدك الجيش المصري يعمل حرب. ما هو الجيش لسة مش جاهز. يعني يجو الشباب من مصر يدخلو الحدود، يقوم الجيش الاسرائيلي يقصفهم، تروح مصر تدافع عن نفسها ضد العدوان. وهيك بتصير حرب. ولا في الأردن، سيمنعهم الجيش الأردني من الوصول إلى الحدود.

حنكشتيكا: شو صار فيك، يمكن حدا دفع لك مصاري عشان تحكي ها الكلام. بدنا زحف مليوني وانتفاضة ثالثة.

أبو معروف: إذا بدك تيّس، تيّس لوحدك. أنا ما بدي أتيّس.

حنكشتيكا: جبان وانهزامي.

أبو معروف: أنت تعرف انا مش جبان ولا انهزامي. أنا مناضل في أيام شبابي، حملت سلاح ومتفجرات ودخلت فلسطين عن طريق البحر. ومسكوني. لو كنت في جبان، ما كنت انضميت للثورة وأصريت على القيام بعملية فدائية. بس المسألة بدها عقل.

حنكشتيكا: كنت مناضل وشجاع وصرت متخاذل وجبان.

أبو معروف: أنا بتكلم من روح المسؤولية. إحنا لازم نفكر عشر مرات قبل ما نعمل انتفاضة.